Heba arribau a las vacacions con
a batería cuasi acorada. A suya vida s’heba tornau en una endrecera
plena de barderas y marradas periglosas que se veniban a l’arreu sin garra
descanso.
Os problemas economicos, o miedo
a la perdida d’o suyo treballo, y una relación de parella prou toxica heban
feito sobreixer a suya capacidat de control. Yera plegando en un estau
depresivo que empliba o suyo ser d’un azogue que le feba incapable de fer
decisions pa prener a dirección correcta y deixar o rumbo que heba preso y que
le levaba a lo suyo final.
Le feba falta un chicot
parentesi, desconnectar de tot y de toz. S’entrefiló que unos días solo en bel
lugarón costero d’o sud le aduyaría a relaixar-se y reflexionar. O contacto con
o mar siempre l’heba feito a-saber-lo goyo y le transmitiba paz y tranquilidat.
Encara que yera a pocas de fer
gatatumba per unas inversions que fació en bel fundo d’inversión con risgo
elevau, heba aladiau uns diners per si un caso, “siempre t’has de guardar una
pera pa la set”. Alavez que millor forma que fer-los servir pa eslampar uns
días d’ista rutina y meditar sobre lo suyo futuro.
Arribó a ixe poliu lugar d’Uelva
cuan o mes d’agosto yera esmediau. L’apartamento que heba logau no yera guaire
fachendoso, yera una antiga vivienda de pescadors reformada y aprestada pa los
estivaires. Se podeba decir que de luxos, no en teneba garra, manimenos yera chunto a lo mar, podeba sentir o rudio de
l’oliache dende a cama cuan s’adormiba. En primeras tot yera perfecto, s’entrefilaba
unas vacacions pistonudas.
Malas que arribó a ixa localidat
onubense deixó dezaga toz problemas que existiban en a suya vida. Pareixeba que
a distancia física los aleixaba, a lo menos d’a suya mente. O mar, i aduyaba
prou. Toda ixa tranquilidat que experimentó os primers días se tornó en un magnetismo
barucoso que no le permitiba sacar d’o suyo pensamiento ixa inmensidat d’augua
y salobre.
Mientres o día no feba que pasiar
per la orilla deixando-se embuyir per a bisa y o rudio d’as botinadas. Astí
feba gambadetas durant horas embelecau per ixa fascinación que le provocaba la
costa. De nueiz cuasi no podeba filar uello. Se’n saliba t’a balconeta que i
heba en o dormitorio. Astí se miraba fito-fito a lo mar. Columbrar ixa
inmensidat le feba estremeixer y o reloch pareixeba aturar as horas.
De cabo cuan teneba un ratet de
lucidez, alavez feba cuenta de que bella cosa no marchaba bien, yera
tornando-se loco, no entendeba o motivo per lo cual no podeba adubir-se de atalayar o mar.
Dende fa bel día i hai luna
plena. Será o ciclo lunar u soi tornando-me barrenau?
Siga como siga istos ratez no
duraban guaire y Chabi tornaba a la suya obsesión per lo mar, sin fer-ne
cuenta, d’una manera cuasi instintiva.
Yera a zaguera tarde d’agosto, lo
día d’o suyo aniversario. Se chitó t’a cama bien luego y como cuasi toz días no
conseguiba adormir-se. Se sentiba alticamau y niervudo, no feba que chemecar y
a sudor s’eslizaba per tot lo suyo cuerpo y per si no en teneba prou un bruciu
infernal s’apodero d’a suya cabeza. De momento, se devantó d’a cama. A suya
cara pareixeba la d’un sonambulo. Rancó a andar, salió de l’edificio y enfiló t’o mar.
Allí , en a orilla, con os piez
clavaus en l’arena mirando desafiant a lo sol, que yera a pocas de amagar-se
en l’horizont, s’afundió en l’augua dentrando-ie a paso firme y, d’una manera
sincronizada con l’astro, desapareixioron ambos.
O sol como toz os días tornará a brilar manyana cuan raye l’alba.
