Hetz iu nunca t'a Sierra d'Armantes? No tos ne faigatz, yo tampoco no la conoixeba encara que o mio lugar ( Villarroya de la sierra) ye a bells seis kilometros d'allí. Asinas que como hetz puesto fer-ne cuenta, no tiengo garra desincusa.
Aproveitando que puyé t'o lugarón dos días iste puent d'o pilar, embrequé a lo mío amigo Angel pa ir-ie. A verdat ye que no fa burro falso y tos aconsello de que i vaigatz. Ista sierra ye ubicada en a comarca de Calatayut entre as valls d'os rios Ribota y Manubles , y antiparte fer una curseta sin mica dificultat per astí, podretz columbrar unas envistas bien polidas.
Ye conoixida como o "far west aragonés" per uns accidents cheograficos que i trobaretz prou curiosos. Seguntes m'han dito son d'a epoca cheolochica terciaria y fan un mezclallo de colors rolliscas bien mahas. Suposo que o motivo d'istas tonalidatz ye a riqueza en buro y cheso d'o terreno. A chent d'a redolada los claman "castiellos".
Antesmás estió poblada per bandolers, ye de dar que i habrá buena cosa de cubils pa amagar-se-ie. Per ixo cuenta a tradición oral que ta part d'alavez quan belún heba de fer un desplazamiento y le caleba pasar cerqueta d'ixa sierra a chent gosaba decir-le : "arma-te antes", y d'ixa apocope s'encertó o suyo nombre.
