RASMIA Y BALONCESTO

Me cuaca a-saber-lo  ir t'o  Pabellón José Luis Abós a mirar-me os partius de baloncesto que se i chugan. Comencipié a ir-ie con a mía companyera , y anque dengún no somos guaire entendius d´iste esporte, nos fa firme goyo disfrutar d´o ambient y espectaclo que se i puet trobar.

En zagueras, o basket Zaragoza ye fendo-lo prou bien, l'anyo pasau chugó os playoffs d'a ACB, mesmo arribó en as semifinals.

Ahiere podiemos disfrutar de un partiu bien interesant y important, ¡no que ganemos a lo Reyal Madrit!, Amás chugando de pistón, sin garra complexo, como cal fer-lo.

Tos he dito que no soi guaire entendiu en baloncesto, me fa falta aprender-ne más encara, con tot y con ixo  paré cuenta que bella vez o diner no puede mercar-lo tot.

O Reyal Madrit ye un equipo feito a lo gran sin garra problema economico, con o refirme de una gran institución que de diners, en tien arrienda. Totz os suyos chugadors son estrelas mundials .

O Basket Zaragoza ye un prochecto humilde, prebando de emplegar bien os poquetz recursos economicos que tien. Anque  diners, no bi'n ha guaires o cuerpo tecnico  ha treballau con intelichencia y han feito que podamos tener una chicarrona baruca quan nos pensamos en l'esdevenidero.

Victorias, cal que bi'n haiga beluna ista temporada pero no pas tan emocionante como ista zaguera que hemos puesto veyer.
Bi ha cosas, que dengún nunca no podrá mercar-ne :

O treballo bien feito y a rasmia que amostró o nuestro equipo.

   

  

L'AGÜERRO

Quan i plega L'agüerro os paisaches se implen d'unas envistas que gosan tornar-nos melanconiosos. Regular que ista estación siga l'inspiración de muitos poetas, me pienso que nomás mirando-se t'o suyo arredol as rimas les surten de camín.

Zarrando os uellos y prebrando de fer acordanza d'a santmigalada, comencipian a acucutar bellas alufras polidas d'o mio lugar, en ellas i amaneixen vinyas a on que bi ha cepas vuedas d'ugas, pero bien plenas d'ixe mezclallo de colors que fan as fuellas quan se meten royiscas y amarillentas. I son descansando-se d'as nafras que a vendema les han dixau entre que a fredor d'o hibierno i plega.

Quan i puyo en ista estación me cuaca a-saber-lo gambadiar por istos paraches, asinas me embabieco mientres bell ratet. De cabo ta quan o bufar d'o aire fa que torne t'a realidat unatra vegada. Me fa falta prebar d'ista merecina que imple o mio ser d'ixa enerchía que nomás  puet trobrar-se en a naturaleza.

Pa yo l'agüerro ye una mena de regalo que nos ufre l'orache, amortando ixa fuixina d'o verano dica que comencipia l'hibierno. CAL DISFRUTAR-LO!

AINIELLE

Posada en ixa tabierna raixosa d'o barrio d'a latina no entendeba como yera plegada en tal situación. A suya man dreita tremolaba cada vegada que agafaba l'ordio pa beber-ne, a zurda la teneba dencima d'una mena de mochila esportiva que heba alzada en a silla d'o suyo costau mientres la cosiraba. Ista sería a zaguera vegada que lo feba, amenistaba aturar y fuyir d'iste mundo en que yera embrecada. A pudor que surtiba d'ista clase de vida no le deixaba alentar.
Malas que arribó en Madrit Ainielle habió d'espiocar treballando en qualsiquier cosa que trobaba: en una fabrica, en una botiga de ropa, de cambrera, y mesmo fendo bell mandau pa o mainate d'una clica que s'adedicaba a o negocio d'a cocaína, quan prencipió a estar esqueferada.
Dende que s´heba revellau ixe maitín un mal barrunto yera dondiando por tot o suyo cuerpo. Quan le proposoron o treballo le dicioron que levaría dos kilos y malas que pilló a mochila paró cuenta que en yera más, le heban feito burro falso, pero nomás le caleba continar entabán y transportar a farina.
O mesache encargau d'ir a escar a mochila no i yera plegau encara, y pa forro de bota no lo conoixeba. O suyo instinto le deciba que bella trachedia veniba de camín. Nunca no yera estada tant niervuda, as chislas de sudor se´n eslizaban por a suya frent. Dende que arribó en o bar no aturó d'alufrar a os clients que i yeran dica que de sopetón le fació atención que bi heba un choven prou pincho mirandose-la fito fito, no guaire aluenyau d'o puesto a on yera ella en a barra. ¿Sería él a persona a qui teneba que dar a coca? 
De rapiconté ixe mesache se debantó y se'n enfiló ta Ainielle y quan plegó en o suyo costau, l'amostró una placa que heba ixenegau d'a suya pocha entre que le deciba:
-Policia! No cal fer una titabola, amenisto veyer o tuyo D.N.I., tamién has d'ubrir ixa mochila, me fería goyo mirarme-la.
O suyo corazón traquetiaba aventau,no podeba eslampar, totz os suyos preixinallos s'heban amortau en un inte.
Quan o desespero plega en a nuestra endrecera gosamos prener esbarres no guaire correctos que nos fan arribar en puestos no deseyaus. Ainielle habrá de pagar un pre a-saber-lo de gran dica que torne a fer o suyo camín unatra vegada.

O SOL Y A LUNA

Quan arribetz  a la mia vida s'ubrió una finestra que yera zarrada dende feba muito tiempo, os cristals foscos que bi heba no me deixaban admirar ixas alufras polidas que dende ixe inte prencipie a veyer.

En as envueltas en que tos conoixié venibatz de fer un camín que d'entrepuzos y zaborros en teneba un fascal, con tot y con ixo nunca no deixetz de continar barucosas. M'hetz contimostrau que cal aladiar t'o costau os miedos y vivir plenos de rasmia sin remenar o pasau.

Nerea yes o sol, estrela que surte enerchia y fa luz a qualsiquiera que siga a o tuyo canto, indo con tú o viache me ferá firme goyo.

Luna, te clamoron asinas remerando a ixe satelite, que ye capable de creyar as mareas y mesmo os lupos otulan mirando-se-la quan ye plena.

Chuntas dentretz en a mía endrecera y chuntas hetz clixau o mío mundo, emplindo-lo d'un mezclallo de colors que fa acordanza a las envistas d'un cabotarde africano. Quan tos ne reditz os vuestros uellos brilan de una traza que embelecan chitando unas luzadas que s'eslampan dica l'infinito.

L'esdevenidero ye ixa historia que no ye escrita encara, pero de seguras, que ixas ideyas que son dondiando por o nuestros tozuels, a la fin rematan bien refleixadas en ixas fuellas vuedas que  tenemos debant por escribir y que son o nuestro futuro.

Vusatras le hetz feito un firme remango a la vida cada vegada que  s´ha tornau inchusta y nunca no hetz deixau de luitar por os vuestros suenios, continatz fendo-lo asinas fillas.

En zagueras soi ateclando ixa viella finestra, porque heba de sacar-le bella escalla que punchaba a-saber-lo, antimás le caleba un buen banyo de berniz. Pa rematar habré de limpiar ixos cristals porque quan plegue a fredor habré de trancar-la... No quiero tornar a vivir en ixa escurina que me aluenya d'as cosas que en veras fan a o mundo chirar.

A LUITA DE CHERMAN

No feba guaire tiempo que o suyo representant heba pautau o combate mas important d'a suya vida esportiva. Yera luitando por o titol europeu de peso walter y anque heba habiu d'acotraciar a baralla a garras templadas, teneba firmes opcions de ganar-la, porque Chermán siempre yera estau un mesache anglucioso y fainero, antimás veniba de una epoca en que yera fendo un boxeyo pistonudo.

A realidat se tornó prou diferent dende que sonó a campana quán prencipió o combate, o suyo oponent boxiaba de una traza brutal, anque yera una mica viello teneba una tecnica y intelichencia que lo feban muit perigloso. Dimpués d'o debantzaguer asalto enfiló t'a suya cantonada y se i acofló, nomás en quedaba uno pa rematar a vilada, y yera recibindo una sundela  a-saber-lo de gran, levaba o uello dreito prou boninflau, quasi no i veyeba cosa por él.

O suyo entrenador le chilaba :

-¡NO YES FENDO-LO BIEN! Has de meter-te en a curta distancia

-Ye embolicau ganar en os puntos, cal noquiar-lo en iste zaguer asalto.
-¿Yes escuitando-me? Pareixes anieblau hue... amenistas creyer en tu.

-Habrás de fer bella combinación d'as que t'he amostrau pa deixar-lo KO.

Tornó a sonar a campana, ista estió o sinyal de que nomás teneba tres minutos pa ficar-le un punyazo a o suyo oponent y espaldar-lo dencima d'o ring.

Anque l'atro boxiador heba feito un buen combate dica iste momento, prencipió a estar canso, y cada vegada abatanaba más a monico con as suyas mans . Chermán barruntó isto y anque yera quasi redotau, luen de chitar a tovalla, se tornó pleno de rasmia y o combate cambió de raso. De rapiconté comencipió a meter os suyos jabs rapidos y le feban maca a o suyo rival. Quan nomás quedaba un minuto, esquivó un directo de zurda decantando-se t'a dreita, dimpués  d'una enrestida le fotió una combinación de trucos machistral rematando con un crochet potent. Asinas deixó esboldregau a o suyo rival. L'arbitro prencipió a contar: uno, dos, tres...y quán por as suyas orellas dentró el soniu d'o zaguer numero, as suyas garras prencipioron a tremolar y bellas glarimas cayioron d'os suyos uellos. O publico que i yera se tornó barrenau y una tarramotera graniza plenó o puesto.

Nunca no heba sentiu cosa pareixida, y anque tot o suyo cuerpo yera una royura, a felicidat plegó en él quán prenió o cinturón de campión. No guaire chen creyó  en as suyas posibilidatz, manimenos Chermán continó t'a debant sin reblar. Muitas vegadas, no pas atras, cal luitar por os tuyos suenios y... de cabo ta quán se farán realidat.