AINIELLE

Posada en ixa tabierna raixosa d'o barrio d'a latina no entendeba como yera plegada en tal situación. A suya man dreita tremolaba cada vegada que agafaba l'ordio pa beber-ne, a zurda la teneba dencima d'una mena de mochila esportiva que heba alzada en a silla d'o suyo costau mientres la cosiraba. Ista sería a zaguera vegada que lo feba, amenistaba aturar y fuyir d'iste mundo en que yera embrecada. A pudor que surtiba d'ista clase de vida no le deixaba alentar.
Malas que arribó en Madrit Ainielle habió d'espiocar treballando en qualsiquier cosa que trobaba: en una fabrica, en una botiga de ropa, de cambrera, y mesmo fendo bell mandau pa o mainate d'una clica que s'adedicaba a o negocio d'a cocaína, quan prencipió a estar esqueferada.
Dende que s´heba revellau ixe maitín un mal barrunto yera dondiando por tot o suyo cuerpo. Quan le proposoron o treballo le dicioron que levaría dos kilos y malas que pilló a mochila paró cuenta que en yera más, le heban feito burro falso, pero nomás le caleba continar entabán y transportar a farina.
O mesache encargau d'ir a escar a mochila no i yera plegau encara, y pa forro de bota no lo conoixeba. O suyo instinto le deciba que bella trachedia veniba de camín. Nunca no yera estada tant niervuda, as chislas de sudor se´n eslizaban por a suya frent. Dende que arribó en o bar no aturó d'alufrar a os clients que i yeran dica que de sopetón le fació atención que bi heba un choven prou pincho mirandose-la fito fito, no guaire aluenyau d'o puesto a on yera ella en a barra. ¿Sería él a persona a qui teneba que dar a coca? 
De rapiconté ixe mesache se debantó y se'n enfiló ta Ainielle y quan plegó en o suyo costau, l'amostró una placa que heba ixenegau d'a suya pocha entre que le deciba:
-Policia! No cal fer una titabola, amenisto veyer o tuyo D.N.I., tamién has d'ubrir ixa mochila, me fería goyo mirarme-la.
O suyo corazón traquetiaba aventau,no podeba eslampar, totz os suyos preixinallos s'heban amortau en un inte.
Quan o desespero plega en a nuestra endrecera gosamos prener esbarres no guaire correctos que nos fan arribar en puestos no deseyaus. Ainielle habrá de pagar un pre a-saber-lo de gran dica que torne a fer o suyo camín unatra vegada.