Dimpués de trenta anyos, as mans plenas de duricias, a espalda escruixinada per as protusions discals y a suya cuenta bancaria en numeros royos, paró cuenta que ixe mantra per o cual s’heba rechiu a suya existencia no yera que una faloria. Faloria que fa servir o sistema pa enganyar y trafucar a la chent mientres contina con a suya faina: fizar y fer que s’ixemene o suyo vereno.
Acher, no remató a suya formación academica y
escomencipió a treballar de chesaire en a empresa d’un familiar. Chornadas de
treballo grans y a tallo parello fació que durant una buena epoca ganase
abundanciosos chornals.
No pasoron guaires anyos dende que entró en o mundo d’a
construcción y creó a suya propia empresa con un inversor como socio. Cadaún
s’adedicaba a lo suyo, Acher a o treballo de campo y l’atro a os numers y inversions.
Yera fendo o camín per a endrecera que caleba. Se casó
t’o suyo lugar y con a mesacha que festechó dende siempre. Luna de miel en a
Polinesia Francesa, casa d’anuncio de televisión, empresario en blincar os
trenta y cinco anyos. Lo que se gosa clamar una persona exitosa.
Tot rulaba de pistón, autos de gama alta, segundas
viviendas de luxo, viaches d’ensuenio en os puestos mas exoticos y socializando
de contino en os puestos mas exclusivos. S’heba olbidau d’os suyos orichens y
yera atelau en ixa vida, aleixau d’as suyas radices.
Cuan punchó la bambolla immobiliaria, a suya empresa no podió
fer cara a las enrestidas d'esta crisis. No feba guaire que heban demandau diners
a una entidat bancaria pa construir una
nueva promoción immobiliaria. Muitas facturas a pagar a furnidors, impagaus
d’os suyos clients chunto con bella revesada financiera d’o suyo socio levó a
la companyía ta un concurso de acreedors. Heba feito gatatumba y o suyo
futuro se columbraba bien fosco.
Encara yera choven y o treballo no le espantaba y
escomencipió a mirar treballo como asalariau. A crisi heba chapurniau a toz es
sectors y chunto a la suya falta de formación fació bien difícil que trobase
estabilidat profesional. Dende alavez treballó durant periodos curtez en
treballos de poca cualificación como operario de producción y treballador en
empresas de limpieza. Muitas horas, pocos diners y siempre rezando pa que le
renovasen l’achuste pa continar chenerando paro. Muitos cabos de semana los
adedicaba a fer chicotas reformas en viviendas de conoixius pa quitar chanfles
en negro. Con tot y con ixo no podió refer-se economicament, no en saliba.
En lo personal, a cosa no marchó millor. Ansiedat,
insomnio, cambios de humor, adiccions… tornoron a suya vida en un infierno. A
convivencia con él se feba imposible y a suya muller le demandó lo divorcio y
s’espartioron.
Arribau a ixe punto d’a suya vida, nomás quereba con
langaria una salida rapida a la suya situación. Fochar y fer o camín por a
endrecera correcta no le heba traito que desgracia y desinfins. Se l’entrefiló
que pillar un esbarre pa alcorzar sería intelichent. Fació un apueste bien
arrisgau, un... tot u cosa. Tornar ta ixa vida de luxo, que tantos recosiros le
produciba u pasar buena cosa d’anyos en una fosqueta. Acceptó un treballo que
le proposó o camello que le furniba d’ixa substancia que le feba falta día sin
atro pa poder vivir. Ixe vereno que heba emboirau o suyo sentiu común.
No podeba fer garra pregunta, as instruccions pa fer o
treballo le arribaban a poquet, a zaguera la heba recibida fa una horeta:
continar conducindo per l’autopista A-4 dica plegar en una estación de servicio
de Manzanares. Astí recibirá la siguent orden.
“Alea iacta est”
